खासदार राजीव सातव यांचे निधन;कुशल नेतृत्व हरपल्याची भावना

 

पुणे, बातमी24:- राज्य सभा खासदर तथा काँग्रेस पक्षाचे नेते राजीव सातव यांचे कोरोनाच्या संसर्गामुळे रविवारी पहाटे निधन झाले. राजीव सातव यांच्या रूपाने मराठवाड्याने उमदे नेतृत्व गमावल्याची प्रतिक्रिया राज्यभरातील नेत्यांनी व्यक्त केली.

मागच्या काही दिवसांपासून राजीव सातव यांच्यावर पुण्यातील खासगी रुग्णालय येथे उपचार सुरू होते.रविवारी सकाळी त्यांची प्राणज्योत मावळली. हिंगोली जिल्ह्यातील कळमनुरी येथुन त्यांच्या राजकीय जीवनास सुरुवात झाली.पंचायत समिती सदस्य,जिल्हा परिषद सदस्य,नंतर सभापती,आमदार,हिंगोली लोकसभा खासदार व 2020 मध्ये ते राज्यसभा सदस्य महाराष्ट्रमधून झाले. ते महाराष्ट्र युवक काँग्रेस अध्यक्ष व त्यानंतर युवक काँग्रेसचे देशाचे अध्यक्ष झाले.

कॉंग्रेसचे नेते राहुल गांधी यांचे ते अत्यंत जवळचे निकटवर्तीय म्हणून देशभर परिचित होते.राजीव सातव हे कॉंग्रेसचे गुजरात प्रभारी होते. दीड वर्षांपूर्वी झालेल्या गुजरात विधानसभा निवडणुकीत काँग्रेसला नेत्रदीपक यश मिळवून दिले होते.

मराठवाड्यातून दिल्लीत काँग्रेस पक्षात मोठ वलय राजीव सातव यांनी निर्माण केले होते.अभ्यासु संसदपटू म्हणून त्यांच्याकडे बघितले जायचे.त्यांना चार वेळा संसदरत्न पुरस्कार देऊन गौरविले गेले.त्यांच्या जाण्याने काँग्रेस पक्ष, महाराष्ट्र व मराठवाड्याचे मोठं नुकसान झाल्याची भावना राज्यातील नेत्यांनी व्यक्त केली.