जिल्ह्यातील लॉकडाऊनच्या चर्चेला विराम

नांदेड, बातमी24ः- नांदेड जिल्ह्यात वाढत असलेल्या कोरोनाच्या रुग्णांची संख्या चिंता वाढविणारी आहे. कोरोनाचा प्रादुर्भाव रोखण्यासाठी जिल्ह्यात दि. 9 जुलैपासून दि. 18 जुलैपर्यंत लॉकडाऊन होणार असल्याची जोरदार चर्चा सोमवार दि. 6 जुलै रोजी रात्री नऊ वाजेनंतर झाली होती. जिल्हाधिकारी डॉ. विपीन इटनकर यांनी लॉकडाऊनच्या चर्चांना विराम दिला आहे.

कोरोनाच्या रुग्णांची वाढती संख्या पाहता याबाबत पालकमंत्री अशोक चव्हाण व जिल्हाधिकारी डॉ.विपीन इटनकर यांच्यात एकमत झाल्याचे बोलले जात होते. यावरून जिल्ह्यात लॉकडाऊन लागणार असल्याची जोरदार चर्चा सोशल मिडियावर होत असातना जिल्हाधिकार्‍यांकडून या संदर्भात कोणत्याही प्रकारचा निर्णय झाला नसल्याचे कळविले.

नांदेड जिल्ह्यात कोरोनाच्या रुग्णांची संख्या झपाटयाने वाढत आहे. पूर्वी नांदेड शहरापुरती कोरोनाच्या रुग्णांची संख्या होती. मात्र मागच्या काही दिवसांमध्ये कोरोनाचे रुग्ण हे ग्रामीण भागात ही वाढत आहे. टाळेबंदीमध्ये शिथिलता देण्यात आल्याने लोक बिनधास्तपणे फि रत आहेत. अनेकांकडून शाररीक अंतर ही पाळले जात नाही. बाजार व रस्त्यावर गर्दी वाढत चालली आहे.त्यामुळे जिल्ह्यातील कोरोनाच्या रुग्णांची संख्येत दिवसेंदिव वाढ होत आहे.

आजघडिला नांदेड जिल्ह्यात कोरोनाच्या रुग्णांची संख्या 447 झाली आहे. तर आतापर्यंत कोरोनातून 334 रुग्ण बरे झाले आहेत. औरंगाबादनंतर सर्वाधिक कोरोनाच्या रुग्णांचा मृत्यू नांदेड जिल्ह्यात झाला, असून त्याची संख्या 20 वर गेली आहे. या सगळया पार्श्वभूमिचा विचार करता, नांदेड जिल्ह्यातील कोरोनाच्या रुग्णांची संख्या नियंत्रणात आणणे महत्वाचे आहे. यासाठी प्रशासनावर लॉकडाऊनचा निर्णय घेण्याबाबत जनतेमधून दबाव वाढत आहे.

सोमवार दि.6 जुलै रोजी पालकमंत्री तथा सार्वजनिक बांधकाममंत्री अशोक चव्हाण यांनी कोरोनाच्या संदर्भान अधिकार्‍यांसोबत आढावा बैठक घेतली. या बैठकीत लॉकडाऊन बाबत चर्चा झाल्याचे सांगण्यात आले. यातूनच दि.9 जुलै ते 18 जुलै असे नऊ दिवसांचे लॉकडाऊन लागणार अशी चर्चा सुरु झाली होती. अशा चर्चांना डॉ. इटनकर यांनी विराम दिला आहे.
——
जिल्ह्यातील सर्व परिस्थितीचा प्रातिनिधीक स्वरुपात समाजातील सर्व घटकांचा विचार करून आवश्यकता भासल्यास निर्णय घेतला जाईल.
डॉ. विपीन इटनकर ः जिल्हाधिकारी नांदेड.