राज्यातील अत्याधुनिक मीडिया स्टुडिओ

नांदेड, बातमी24ः स्वामी रामानंद तीर्थ मराठवाडा विद्यापीठात मीडिया स्टुडिओचे काम अंतिम टप्प्यात आले असून अत्यंत अत्याधुनीक यंत्रणा असलेला हा स्टुडिओ लवकरच विद्यार्थी व व्यावसायिक कामासाठी खुला होणार आहे.

स्वामी रामानंद तीर्थ मराठवाडा विद्यापीठात माध्यम शास्त्र संकुलाचे उद्धघाटन 2009-10 या वर्षी तत्कालीन मुख्यमंत्री व विद्यमान पालकमंत्री तथा राज्याचे सार्वजनिक बांधकाम मंत्री अशोक चव्हाण यांच्या हस्ते झाले. माध्यम शास्त्र संकुलाचे संचालक डॉ दीपक शिंदे यांनी नियोजन केले, निधी उपलब्ध करून घेण्यासाठी वेगवेगळ्या संस्था कडे प्रस्ताव पाठवले व सुमारे दोन करोड रुपये या कामाकरिता उपलब्ध झाले. त्यातुन या स्टुडिओची उभारणी झाली.

विद्यापीठ परिक्षेत्रातील विद्यार्थ्यांना इलेक्ट्रॉनिक मीडियाचे शिक्षण मिळावे, या करिता विद्यापीठ अनुदान आयोगाकडे 12 व्या वित्त आयोगाच्या तरतूदीनुसार प्रस्ताव देऊन यंत्र सामुग्री मंजूर करून घेतली. त्यातुन अँपल या कंपनीचे आय मॅक संगणक व व्हिडीओ ग्राफी करिता सोनी, निकॉन कंपनीचे व्हिडीओ व स्टील कॅमेरे खरेदी करण्यात आले आहेत. सोबतच मीडिया उद्योगात वापरले जाणारे एडिटिंग सॉफ्ट वेअर व अनुषंगीक साहित्य खरेदी करण्यात आले आहे.

स्टुडिओ चे काम मार्गी लावण्यासाठी बेंगलोर, हैदराबाद, मुंबई येथून कारागीर बोलावत विविध कंपन्याना काम देत हे काम आता अंतिम टप्प्यात आले आहे. या स्टुडिओमुळे मराठवाड्यातील विद्यार्थ्यांना फायदा होणार आहे. काही व्यावसायिक कामे करून निधी उपलब्ध करता येणार आहे.अनेक वर्षाच्या प्रतीक्षेनंतर अंतिम टप्प्यात आलेल्या या कामावर शेवटचा हात फिरवण्याचे काम सुरु आहे.