जिल्हाध्यक्ष इंजि.प्रशांत इंगोले यांची माहिती
नांदेड,बातमी24ः-जिल्हा स्तरावर कोरोनाचा प्रादुर्भावावर अंकुश मिळविण्याच्या दृष्टीने प्रशासनाने दुबार संचारबंदी लागू केली आहे. नागरिकांच्या हिताच्या दृष्टीने जिल्हा प्रशासनाने घेतलेल्या निर्णयास वंचित बहुजन आघाडीकडून सहकार्याची भूमिका घत आहे. मात्र संचारबंदी काळात गोरगरीब, मजूर, कष्टकरी, कामगार वस्त्यांमध्ये दैनंदिन गरजांची विशेष यंत्रणेमार्फत पूर्तता करण्यासाठी प्रशासनाने सजग रहावे, असे आवाहन नांदेड उत्तरचे जिल्हाध्यक्ष इंजि. प्रशांत इंगोले यांनी केले आहे.
इंजि. प्रशांत इंगोले यांनी या आवाहनात म्हटले आहे की, जिल्हा प्रशासनाला याआधीही वंचित बहुजन आघाडी तर्फे कोरोना लॉकडाऊन दुसर्‍या फेरीच्या पार्श्वभूमीवर महत्त्वपूर्ण बाबी लक्षात आणून दिल्या आहेत. त्यात प्रामुख्याने केरळ मॉडेलच्या धर्तीवर जनजागृतीची आग्रही मागणी केलेली आहे. कष्टकरी अर्थात हातावर पोट असणार्‍या गोरगरिबांच्या चुली लॉकडाऊन काळात बंद होणार नाहीत, याची खबरदारी घेणे प्रशासनाची जबाबदारी आहे, असेही वंचित बहुजन आघाडीच्या वतीने प्रशासनास कळविण्यात आले.
कोरोनामुळे नांदेड जिल्ह्यात चिंताजनक परिस्थिती बनत चालली आहे. तरी जनतेने घाबरून जाऊ नये. स्वतःची प्रतिकारशक्ती वाढविण्यावर भर देऊन कोरोनाला अटकाव करावा. प्रशासनाने कोरोना साखळी खंडित करण्यासाठी उचललेल्या दुबार लॉकडाउनच्या निर्णयाचे स्वागत करून सहकार्य करावे, असे आवाहन वंचित बहुजन आघाडी तर्फे करण्यात आले आहे.
