नांदेड,बातमी:-सेवेत असताना वडिलांचे छत्र हरपलेल्या पाल्यानं त्यांच्या जागी सेवेत घेण्याचा शासन निर्णय महत्वकांक्षी मानला जातो. अशा 67 उमेदवारांना अनुकंपा तत्वावर सेवेत घेण्याचा महत्वपूर्ण निर्णय जिल्हा परिषद मुख्य कार्यकारी अधिकारी वर्षा ठाकूर यांनी बुधवार दि.12 रोजी घेतला आहे.
मागील काही दिवसांपासून अनुकंपा तत्त्वावरील नियुक्तीची प्रतीक्षा उमेदवारांना लागून होती.ऐन दिवाळीच्या तोंडावर या उमेदवारांना नोकरीत समावून घेत, या उमेदवारांची दिवाळी गोड करण्यात आली आहे,या कामी जिल्हा परिषद सामान्य प्रशासन विभागाचे उपमुख्य कार्यकारी अधिकारी डॉ.सुधीर ठोबरे यांनी तंतोतंत यादी तयार करण्यात महत्वाची भूमिका बजावली.
67 उमेदवारांना विविध पदावर नियुक्ती देण्यात आली असून यामध्ये जेष्ठता शैक्षणिक पात्रतेनुसार 2 उमेदवारांना कनिष्ठ अभियंता पदावर ,2 जणांना स्थापत्य अभियांत्रिकी सहायक,एकास आरोग्य सेवक,3 जण पशुधन पर्यवेक्षक,23 जण कनिष्ठ सहायक तर 36 जणांना परिचर/शिपाई पदावर नियुक्ती देण्यात आली आहे.अशी माहिती मुख्य कार्यकारी अधिकारी वर्षा ठाकूर यांनी दिली.
