नांदेड,बातमी24ः नांदेड जिल्हा परिषदेचे समाजकल्याण सभापती अ‍ॅड. रामराव नाईक हे भोकर विधानसभा मतदारसंघातील मुदखेड, अर्धापुर व भोकर तालुक्यतील प्रत्येक तांडा वस्तीवर जाऊन विविध समस्या व तांडयावरील लोकांच्या अडीअडचणी समजून घेत आहे. यासंबंधीचे जबाबदारी सार्वजनिक बांधकाममंत्री तथा पालकमंत्री अशोक चव्हाण यांनी त्यांच्यावर सोपविली आहे.
पालकमंत्री अशोक चव्हाण यांच्या आदेशानुसार अ‍ॅड. रामराव नाईक हे मागच्या पंधरा ते वीस दिवसांपासून नित्याने ग्रामीण भागाचा दौरा करत आहेत. या दौर्‍याच्या निमित्ताने दिवसाकाठी पाच ते दहा तांडयांना भेटी देऊन त्या ताडयाला मिळालेल्या विकास निधीची प्रशासकीय मान्यता त्या ताडयावरील नाईक व प्रमुख नागरिकांच्या स्वाधीन करून यापुढे तांडयावर काय-काय कामे प्रस्तावित करता येऊ शकतात, याचा आढावा घेऊन पालकमंत्री अशोक चव्हाण यांच्याकडे माहिती देण्याचे काम करत आहेत.
भोकर विधानसभा मतदारसंघातील बहुतांशी तांडे अ‍ॅड. रामराव नाईक यांनी भेटी देऊन पूर्ण केली आहे. अशोक चव्हाण यांनी सुद्धा या मतदारसंघात दलितवस्ती विकास योजनेअंतर्गत करोडो रुपयांचा निधी देऊ केला,असून प्रत्येक गावात समाजमंदिराच्या उभारणीचे कामे हाती घेतली आहे. तांडा विकासासह दलितवस्तीचा विकासाचा अजेंडा अशोक चव्हाण यांनी हाती घेतला, असून ही कामे दर्जेदार झाली पाहिजेत, यासंबंधीची जबादारी समाजकल्याण सभापती अ‍ॅड. रामराव नाईक यांच्यावर सोपविली असल्याचे सांगण्यात येते.
