नांदेड,बातमी24:- समाज कल्याण विभागामार्फत राबविल्या जाणार्‍या दिव्यांगाच्या विविध योजना अधिक प्रभावीपणे दिव्यांगापर्यंत पोहचविण्यासाठी दिव्यांग मित्र अ‍ॅपची निर्मिती करण्यात आली आहे. या अ‍ॅपच्या माध्यमातून दिव्यांग बांधवांना मोलाची मदत होईल, असा विश्वास राज्याचे सार्वजनिक बांधकाम मंत्री तथा नांदेड जिल्ह्याचे पालकमंत्री अशोक चव्हाण यांनी व्यक्त केला.
जिल्हाधिकारी कार्यालय परिसरातील डॉ. शंकरराव चव्हाण जिल्हा नियोजन भवनात या अ‍ॅपचे ऑनलाईन उद्घाटन पालकमंत्री श्री. चव्हाण यांच्या हस्ते झाले. त्यावेळी ते बोलत होते. यावेळी जिल्हा परिषद समाज कल्याण समितीचे सभापती अ‍ॅड. रामराव नाईक, जिल्हाधिकारी डॉ. विपीन इटनकर, सहाय्यक जिल्हाधिकारी डॉ. अभिनव गोयल, मनपा आयुक्त डॉ. सुनिल लहाने, जिल्हा परिषदेचे प्र. मुख्य कार्यकारी अधिकारी डॉ. शरद कुलकर्णी, जिल्हा नियोजन अधिकारी एस. बी. कोलगणे, सार्वजनिक बांधकाम विभागाचे अधिक्षक अभियंता अविनाश धोंडगे, जिल्हा शल्य चिकित्सक डॉ. निळकंठ भोसीकर, डॉ. शंकरराव चव्हाण वैद्यकीय महाविद्यालयाचे अधिष्ठाता डॉ. चंद्रकांत म्हस्के, शासकिय आयुर्वेदिक महाविद्यालयाचे अधिष्ठाता डॉ. यशवंत पाटील आदी मान्यवर उपस्थित होते.
या दिव्यांग मित्र अ‍ॅपमध्ये दिव्यांग व्यक्तींना आपली नोंदणी करुन विविध योजनांची माहिती त्यांना घेता येणार आहे. शासनाकडून दिल्या जाणार्‍या मदतीची माहिती या अ‍ॅपवरुन मिळणार आहे. शासनाकडून पाठविण्यात आलेल्या सूचना अथवा संदेश या अ‍ॅपद्वारे पाहता येणार आहेत. दिव्यांगानी या अ‍ॅपद्वारे सोप्या पध्दतीने आपली नोंदणी करुन स्वत:चे नाव, स्थानिक स्वराज्य संस्थेचे नाव, पत्ता, मोबाईल क्रमांक, आधार क्रमांकासह इतर माहिती भरणे आवश्यक आहे.
माहिती नोंदणी झाल्यावर ती डॅशबोर्डवर दिसते. यामध्ये आर्थिक, वैयक्तिक माहिती, स्वत:ची कागदपत्रांच्या माहितीची नोंदणी करणे आवश्यक आहे. पुर्ण माहिती भरल्यानंतर समाजकल्याण अधिकारी सदर माहिती पडताळणी करुन अप्रु करतात. दिव्यांग व्यक्तीची डॅशबोर्डवरुन बँकेची, आर्थिक, शैक्षणिक इत्यादी माहिती घेतली जाते.
