नांदेड, बातमी24ः नांदेड येथील आंबेडकर समाजातील युवक नेतृत्व राहूल प्रधान यांच्या खांदावर आझाद समाज पक्षाचे राष्ट्रीय अध्यक्ष चंद्रशेखर आझाद यांनी महाराष्ट्राची धुरा सोपविली आहे. महाराष्ट्राच्या दोन दिवसांच्या दौर्‍यावर आलेल्या चंद्रशेखर आझाद यांच्या उपस्थितीत राहूल प्रधान यांनी महाराष्ट्र प्रदेश अध्यक्ष पदाची सुत्रे स्विकारली.
राहूल प्रधान यांनी काही दिवसांपूर्वी युवा पॅथर या सामाजिक संघटना बरखास्त करून आझाद समाज पक्षाचे राष्ट्रीय अध्यक्ष चंद्रशेखर आझाद यांच्या उपस्थितीत प्रवेश केला होता. यापूर्वी यांनी लोकसभा व विधानसभा निवडणुकीत अ‍ॅड. प्रकाश आंबेडकर यांच्या मार्गदर्शनाखाली वंचित बहुजन आघाडीत काम केले होते.त्यानंतर त्यांनी युवा पॅथर नावाची संघटना संपुष्टात आणत दिल्ली येथे आझाद समाज पक्षात प्रवेश केला होता.
चंद्रशेखर आझाद यांनी उत्तर भारतामध्ये दलित समाजातील युवकांचे आझाद पक्षाच्या माध्यमातून संघटन उभारले आहे. देशभर होणार्‍या दलितावरील अन्यायाविरोधात आवाज उठविणारे प्रतिक म्हणून ते पुढे आले आहेत. हाथरस सारख्या घटनेत चंद्रशेखर आझाद यांची पिडितांच्या बाजून घेतलेली भूमिका देशभर लक्षवेधी व निर्णायक ठरली होती.
——-
अस्वस्थ समाजाचे प्रतिक म्हणून आझाद समाज पक्ष देशभर काम करत आहे. महाराष्ट्रात सुद्धा युवकांचे संघटना बांधणे हे पुढील काळात महत्वाचे कार्य असणार आहे.
राहूल प्रधानः नवनियुक्त राज्य अध्यक्ष आझाद समाज पक्ष, महाराष्ट्र
